பகிரப்படாத பேட்டி

முப்பது வருடமாக எதிர்காற்றில் நீச்சலடித்து குச்சி ஐஸ் விற்கும் ஒத்தையால் கருப்பசாமி அண்ணன். அப்படியே, அகலக்கேரியர் சைக்கிளோடு ஒரு உதிரிப் பாகமாய் மாறிப்போன மண்ணெண்ணை விற்கும் ராமர் அண்ணாச்சி. உழவு மாடுகளை மாற்றி மாற்றி பிராணிகளின் பாஷை பழகிப்போன வண்டிக்கார கோபால்நாயக்கர். மூன்று தலைமுறையாய் பாபுபேக்கரி  டீப்பட்டறையில் நடுராத்திரிகள் நின்று சுரம் விழுந்த காலோடு ஒரு தூணாய் மாறிபோன மாரிக்கோணார். விளக்குக் கம்பத்தடி கிழிந்த குடைக்கு கீழே உட்கார்ந்தபடி பரபரக்கும் ஜனசந்தடி அதன்கால்களைக் கவனித்தபடி வாழ்க்கயின்விளிம்பில் காத்திருக்கும் வெங்கடாசலபுரத்துத் தாத்தா. இவர்களிடம் உழைத்தால் உயரலாமா என்று கேட்டு, வாங்கி, கட்டிக் கொண்டு வந்திருக்கிறேன் மூட்டை நிறைய்ய பெருமூச்சையும், அதை விடஅதிக கெட்டவார்த்தைகளயும்.